सीडीओ अफिसका कर्मचारी चढेको जीप दुर्घटना, प्रशासकीय अधिकृतसहित चारको मृत्यु (अपडेट)

जिल्ला प्रशासन कार्यालय, गुल्मीका कर्मचारीहरू सवार जीप दुर्घटनामा परेको छ । कार्यालयका प्रशासकीय अधिकृत श्याम न्यौपानेसहित चार जनाको मृत्यू भएको छ ।

गुल्मीबाट प्युठानको स्वर्गद्वारी जाँदै गरेको जीप प्यूठानको रुमालेमा दुर्घटनाग्रस्त हुँदा घटनास्थलमा दुई जनाको मृत्यू भएको जिल्ला प्रशासन कार्यालय, गुल्मीका सूचना अधिकारी उद्भव पन्थीले बताउनुभएको छ ।

लु१ज १६५५ नम्बरको जीप स्वर्गद्वारी नगरपालिका–१ रूमालेको जङ्गलमा दुर्घटना हुँदा दुई जनाको घटनास्थलमै मृत्यु भएको पन्थीले बताउनुभयो । उहाँका अनुसार निधन भएका अन्य कर्मचारीमा सूर्य प्रसाद पन्थी र ईश्वरी भण्डारी हुन् । साथै, चालकको समेत ज्यान गएको पन्थीले जानकारी दिनुभएको छ ।

घाइतेहरुको थप उपचारको निम्ति हेलिकप्टरमा काठमाडौं लैजाने तयारी भइरहेको जनाइएको छ । जीपमा चालक र सह–चालकसहित १२ जना सवार थिए ।