जन्मिएलगत्तै नयाँ अनलाइन ठहरै « Jana Aastha News Online
Logo
१४ मंसिर २०७८, मंगलवार
|  Tue Nov 30 2021

जन्मिएलगत्तै नयाँ अनलाइन ठहरै

प्रकाशित मिति :  ८ कार्तिक २०७७, शनिबार २२:१३


ठूलै तयारीसहित एक सय दिनअघि शुरु गरिएको नेपाली पब्लिक डटकम (अनलाइन खबर पत्रिका) को यात्रा सम्पादकसहित ११ जना पत्रकारले सामूहिक राजीनामा दिएपछि अनिश्चित भएको छ । गत मंगलबार आफू सम्पादक रहेको अनलाइनमा गैरजिम्मेवार ढंगले समाचार प्रकाशित भएपछि आफूहरू राजीनामा दिन बाध्य भएको सम्पादक कला अनुरागीलगायतकाले बताएका छन् ।

सम्पादकीय स्वतन्त्रताको कुरो उठाउँदै सम्पादक अनुरागीको हस्ताक्षर रहेको बिमल नेेपाल र केेेदार श्र्रेष्ठ हरुको राजीनामा पत्रमा भनिएको छ ‘व्यवस्थापनले रुचि लिएका विभिन्न समाचार सामग्रीहरूका सन्दर्भमा सम्पादकीय स्वतन्त्रताको सिद्दान्तलाई आत्मसात् गरी सञ्चारमाध्यमका सञ्चालक र व्यवस्थापकले समाचार संकलन,सम्पादन,प्रस्तुती र सम्प्रेषणमा कुनै पनि प्रकारको हस्तक्षेप वा प्रभाव नपारी सम्पादकीय स्वतन्त्रताको उच्च सम्मान, संरक्षण र संवद्र्धन गर्नुपर्दछ भन्ने आचारसंहिता स्मरण गराइरहयौँ । त्यसका बाबजुद् सम्पादकीय स्वतन्त्रतामाथि पूर्ण हस्तक्षेप भएपछि सम्पादकीय स्वतन्त्रताको पक्षमा अडिग रहँदै हामीले सामूहिक राजिनामा पेश गरेका छौँ ।’

सम्पादक अनुरागी यसअघि कान्तिपुर दैनिकसँग सम्बद्ध थिए । नेपाली पब्लिकका प्रकाशक सुदिपचन्द्र बख्रेल हुन् भने अध्यक्षमा सुरज खनाल रहेका छन् । आफू सम्पादक र संवाददाता रहेको नेपाली पब्लिक डटकममा समाचार र सम्पादन समूहको जानकारीबेगर व्यक्तिगत स्वार्थमा समाचारहरू प्रकाशित हुन थालेपछि आफूहरूले राजीनामा दिएको उनीहरूको दाबी छ ।

केहि दिनअघि अध्यक्ष खनाल र प्रकाशक बख्रेलको रुचिमा ‘एकजनासँग रकम लेनदेन र मोलमोलाईको कुरो नमिलेपछि छापिएको समाचारले आफूहरूको मानमर्दन भएको’ राजीनामा दिनेहरूले बताएका छन् । अष्ट्रेलियाबाट फर्केका एकजना नेपालीसँग पहिलेदेखि रहेको व्यक्तिगत चिनजानलाई दुरूपयोग गरी लाखौं रूपैयाँको बार्गेनिङमा कुरो नमिलेपछि छापिएको समाचारले एक दर्जन पत्रकारलाई संयुक्त राजीनामा दिन बाध्य पारेको बताइन्छ ।

यसबीच धेरैवटा सञ्चार र प्रकाशन गृहबाट धेरैजना पत्रकारले कोरोना महामारी र लकडाउनको कारण रोजागारी गुमाएका छन् । केहीले रोजगारी नगुमाए पनि बेलैमा तलब पाएका छैनन् । चाडबाडको मुखमा ती सबैको घर परिवारमा निराशा छाएको छ । अर्कोतर्फ कुनै सञ्चारमाध्यममा प्रकाशक र अध्यक्षले सम्पादकीय स्वतन्त्रता हनन् गरेपछि दशैंको मुखमा दर्जन पत्रकार संयुक्त राजीनामा गर्न बाध्य भएका छन् । आखिर जताबाट पनि पेलाईमा पर्ने चाँहि पत्रकार नै हुन् भन्ने यथार्थ चरितार्थ भएको छ ।

प्रकाशक सुदिपचन्द्र बख्रेल पेशाले पत्रकार होइनन् । उनी पुतलीसडकस्थित एमजी ग्रुप कन्सल्टेन्सीका मालिक रहेकाे बताइन्छ। केही महिनाअघि मात्रै उनले आफ्नो कन्सल्टेन्सी रहेको स्टार मलमा उक्त अनलाइन पनि सञ्चालन गरेका थिए । खनाल र बख्रेलले भने सम्पादक समूहले आफूहरूको योजनाबमोजिम समाचार संकलन र प्रकाशन नगरेपछि अष्ट्रेलियाबाट फर्केका एकजना नेपाली बिरुद्धको समाचार प्रकाशित गर्न आफूहरू बाध्य भएको निकटस्थहरूसँग बताएका छन् ।


प्रतिक्रिया दिनुहोस !