मर्यादापालकको काँधमा चढेर संसदमा उपद्रो मच्याउने गंगा चौधरीद्वारा एमाले परित्याग

नेकपा एमालेकी नेतृ तथा निवर्तमान सांसद गंगा चौधरी (सत्गौवा) ले एमाले छाडेको घोषणा गरेकी छन् । आज सामाजिक सञ्जालमार्फत उनले एमाले छोडेर स्वतन्त्र उम्मेदवारी दिन लागेको जानकारी गराएकी हुन् ।

‘आज मैले ठीक निर्णय गरेँ या बेठीक मलाई थाहा छैन । राष्ट्र र राष्ट्रियताको लागि म सधैं लागि रहने छु,जनता भगवान हुन्,जनता नै सर्वपरी हुन्,देशलाई शीरमाथि राखेर आज स्वतन्त्र उम्मेदवार भई जनताको वीचमा आउँदैछु,हजुरहरुको साथ चाहिएको छ’, चौधरीले लेखेकी छन् ।

चौधरी दाङ–१ बाट एमालेको उम्मेदवार बन्ने तयारीमा थिइन् । तर, पार्टीले शान्ता चौधरीलाई टिकट दिने भएपछि उनी सोही क्षेत्रबाट स्वतन्त्र उम्मेदवारी दिने निर्णयमा पुगेकी हुन् ।

अघिल्लो पटक एमालेबाट समानुपातिक सांसद रहेकी चौधरी संसदभित्रको गतिविधिका कारण आलोचित छन् । एमालेले झण्डै ६ महिना लगातार गरेको संसद अवरोधका क्रममा उनी मर्यादापालकको काँधमाथि चढेकी थिइन् ।