भारतीय औषधिका कारण गाम्बियामा दर्जनौं बालबालिकाको मृत्यु, अनुसन्धान शुरु

भारतमा उत्पादित औषधि सेवन गरेका ६६ जना गाम्बियन बालबालिकाको मृत्युपछि विश्व स्वास्थ्य संगठन (डब्लुएचओ) ले अनुसन्धान थालेको छ । भारतीय चार किसिमका औषधि सेवनबाट अफ्रिकी मुलुक गाम्बियाका ती बालबालिकाको मृत्यु भएको आरोप लागेको छ ।

डब्लुएचओले औषधि निर्माता कम्पनी मेडन फर्मास्युटिकल्स र भारतीय नियामक निकायमाथि अनुसन्धान थालेको जानकारी दिइएको छ । साथै विश्व स्वास्थ्य संगठनले ती औषधिको बिक्री वितरणमा प्रतिबन्ध पनि लगाएको छ ।

हरियाणा राज्यमा निर्मित उक्त कम्पनीका खोकीको चार किसिमका औषधि खाएका बालबालिकामा गम्भीर किसिमको मृगौला रोग लागेपछि मृत्यु भएको बीबीसीले जनाएको छ । बालबालिकाको मृत्युपछि गरिएको अनुसन्धानमा औषधिको कैफियत देखिएको डब्लुएचओले जानकारी गराएको छ ।

संगठनले भारतमा निर्मित प्रोमिथो जाइन ओरल सोलुसन, कोफिक्स मलिन बेबी कफ सिरप,माकोफ बेबी कफ सिरप र मागरिप एन कोल्ड सिरपमा मानव स्वास्थ्यलाई गम्भीर हानी गर्ने तत्व फेला परेको जनाएको छ । गाम्बियाको जस्तै उक्त दुःखद् घटना भारतीय औषधि प्रयोग गर्ने अन्य धेरै मुलुकमा समेत हुनसक्ने आकलन गरिएको छ ।

यसबारे भारत सरकार र निकायहरुले हालसम्म कुनै प्रतिक्रिया जनाएका छैनन् ।

फोटो स्रोत : रोयटर्स