देउवामाथि दवाब बढाउन कोइराला खेमा आज पनि जुट्दै

पार्टीभित्र ४० प्रतिशत हिस्सेदारी खोज्दै संस्थापनविरुद्ध मोर्चा कसिरहेको नेपाली कांग्रेसको शेखर कोइराला समूहले आज पनि भेला बोलाएको छ । कोइराला खेमाको अघोषित कार्यालय मानिने बत्तीसपुतलीस्थित अनुपम फुडल्याण्डमा अपरान्ह २ बजेदेखि भेला शुरु हुने जनाइएको छ ।

चुनावको सीट भागबण्डामा संस्थापन पक्षले गरेको बिभेद र त्यसविरुद्ध अपनाउने रणनीतिका विषयमा छलफल गर्न भेला डाकिएको सो समूहका नेता भुपेन्द्रजंग शाहीले जानकारी दिए ।

समानुपातिकको बन्दसूचीमा संस्थापन पक्षले एकलौटी गरेको भन्दै त्यसविरुद्ध कोइराला खेमाले केन्द्रीय कार्यालय घेराउदेखि अलग भेला गर्दै आएको छ । कोइराला खेमाको मागबमोजिम नै कांग्रेसले अन्तिम समयमा समानुपातिक सूची सच्याएको थियो । प्रत्यक्षतर्फ पनि भेदभाव हुनसक्ने भएकाले खबरदारीका लागि भेला आयोजना गरिएको सो खेमाका अर्का एक नेताले जानकारी दिए ।