गठबन्धनका नाममा काँग्रेसले अरु पार्टीको राजनीति खाइदिएको आरोप
पाँच दलीय गठबन्धनको विकल्प खोज्ने औपचारिक निर्णय गरेको जनता समाजवादी पार्टी (जसपा) ले नेपाली काँग्रेसको एकलौटी सोच र कार्यशैलीका कारण गठबन्धन अप्ठेरोमा परेको निष्कर्ष निकालेको छ । सीट भागबण्डामा काँग्रेसी नेताहरु सहयात्री दलप्रति चरम अनुदार भएकाले गठबन्धनको औचित्यमाथि नै प्रश्न उठ्ने अवस्था बनेको सो पार्टीका नेताहरुको भनाइ छ ।
जसपाका एक उच्च नेताले गठबन्धनलाई काँग्रेसले आफ्नो आन्तरिक विवाद र नेताहरुको व्यवस्थापन गर्ने माध्यम बनाएको आरोप लगाए । जसपा मधेस प्रदेशका अध्यक्ष रामबाबु यादवले गठबन्धनभित्र सीट बाँडफाँडमा असन्तुष्टि जनाउँदै कुनै पार्टीका नेता व्यवस्थापन गर्नकै लागि गठबन्धन नगरिएको बुझ्न काँग्रेसका नेताहरुलाई चेतावनी दिए ।
विभिन्न बहानामा काँग्रेसले गठबन्धनमा रहेका अन्य सहयोगी दलहरूलाई सिध्याउन खोजेको यादवको आरोप छ ।
सीट भागबण्डामा काँग्रेसले हेपेको भन्दै गठबन्धन छाड्ने निर्णयमा पुगेको जसपासँग एमालेले तालमेल र सहकार्यको हात फैलाएको चर्चाका बीच यादवको पछिल्लो अभिव्यक्ति सार्वजनिक भएको हो ।
टिप्पणीहरू