महिलाहरुलाई अगाडि राखेर माधवले भन्नुभयो, ‘पदले गर्दा पार्टी बिग्रियो’

पूर्वप्रधानमन्त्री तथा नेकपा एकीकृत समाजवादीका अध्यक्ष माधवकुमार नेपालले पद प्राप्तिकै लागि राजनीतिमा लाग्ने प्रवृति झन् बढेर गएको बताउनुभएको छ । पछिल्लो समय पार्टीका नेता-कार्यकर्ता धमाधम एमालेमै फर्किन थालेपछि उहाँको यस्तो भनाई आएको हो ।

पार्टी संवद्ध अखिल नेपाल महिला संघ (समाजवादी) ले आयोजना गरेको दशैँ विशेष कार्यक्रमलाई सम्बोधन गर्ने क्रममा उहाँले पद नपाउने बित्तिक्कै छोडेर हिँड्ने प्रवृत्ति मौलाएको भन्दै चिन्तासमेत व्यक्त गर्नुभयो । आफूले पटक–पटक अवसर पाउँदा ठीक ठान्ने तर अरुका लागि छोड्नुपर्दा अनुहार अँध्यारो हुने र अर्कोतिर हाम्फाल्ने गरेको भन्दै उहाँले राजनीतिमा नैतिकता र इमान्दारिता हुनुपर्ने बताउनुभयो ।

नयाँ बानेश्वरस्थित काठमाडौं व्याङ्केटमा आयोजित दशैँ,तिहारको शुभकामना आदानप्रदान तथा चियापान कार्यक्रममा विभिन्न तहका नेता तथा कार्यकर्ताको बाक्लो उपस्थितिका बीच अध्यक्ष नेपाल पार्टीको पछिल्लो अवस्थाप्रति चिन्तित हुनुभएको हो । कार्यक्रममा पूर्वप्रधानमन्त्री तथा सम्मानित नेता झलनाथ खनाल,महिला संघकी अध्यक्ष तथा पार्टी उपाध्यक्ष जयन्ती राई, उपमहासचिव विजय पौडेल,युवासंघ अध्यक्ष नरेश शाहीलगायत उपस्थित थिए ।