अमेरिकी मन्त्री ट्रुडो नेपाल आएर यूएई, उज्वेकिस्तान हुँदै किर्गिज जाने

विश्वव्यापी सार्वजनिक मामिलासम्बन्धी अमेरिकी कार्यवाहक सहायक विदेशमन्त्री एलिजाबेथ केनेडी ट्रुडो नेपाल भ्रमणमा आउने भएका छन् । १२ दिने भ्रमणअन्तर्गत उनी भोलि नेपाल आउन लागेकी हुन् ।

सेप्टेम्बर २८ देखि अक्टोबर ९ गतेसम्म उनले नेपालसंगै संयुक्त अरब इमिरेट्स, उज्वेकिस्तान र किर्गिज गणतन्त्रको भ्रमण गर्ने अमेरिकी विदेश मन्त्रालयले जनाएको छ ।

नेपालमा रहँदा मन्त्री ट्रुडोले अल्पसंख्यक समूहका कार्यकताहरु, मिडिया, दूतावासको आदानप्रदान कार्यक्रमका पूर्व विद्यार्थीहरुसंग अन्तरक्रिया गर्ने कार्यक्रम रहेको मन्त्रालयद्धारा जारी विज्ञप्तिमा उल्लेख छ । त्यस्तै, लोकतन्त्रमा मिडियाको भूमिकाबारे छलफल गर्ने बताइएको छ ।

सो क्रममा उनले काठमाडौंस्थित एम्बेसडर फण्ड फर कल्चरल प्रिजर्भेसन (एएफसीपी) साइटहरु पनि भ्रमण गर्नेछिन् ।

त्यस्तै, युएई पुगेर उनले प्यान–अरब मिडिया आउटलेट र दुबई सार्वजनिक नीति अनुसन्धान केन्द्रसंग छलफलमा भाग लिनेछिन् । उज्बेकिस्तानको वेबस्टर विश्वविद्यालयमा उनले मिडिया स्नातक गरेका पेशेवरहरुलाई मुख्य भाषण दिने कार्यक्रम रहने छ । मन्त्री ट्रुडोले किर्गिज गणतन्त्रका आधिकारिक सरकारका प्रवक्ताहरुसंग बदलिएको मिडिया परिदृश्यबारे छलफल गर्ने कार्यक्रम पनि तय भएको छ ।