भ्रामक समाचार फैलाएर इज्जतमाथि दाग नलगाउन मेयर बालेनलाई अस्पतालको जवाफ

काठमाडौको स्वयम्भूमा सञ्चालित मनमोहन मेमोरियल अस्पतालले सम्पत्ति कर नतिरेको भन्ने समाचारमा कुनै सत्यता नभएको जनाएको छ । अस्पतालले सम्पत्ति कर नतिरेको भन्दै काठमाडौँ महानगरले सूचना निकालेकोमा आपत्ति जनाउँदै मनमोहनले नियमितरुपमा कर तिरिरहेको पनि बताएको छ ।

अस्पतालले आज जारी गरेको विज्ञप्तिमा महानगरलाई तिर्नुपर्ने सम्पत्ति कर वडा कार्यालयमार्फत प्रक्रिया पूरा गरि तिर्दै आएको प्रष्ट पारेको हो । सेयर सदस्य, सर्वसाधारण नागरिक, अस्पतालका सेवाग्राही, शुभचिन्तकहरुलाई भ्रामक समाचारप्रति विश्वास नगर्न अस्पतालका प्रमुख कार्यकारी निर्देशक डा. एन शर्माले आग्रह गरेका छन् ।

‘नेपाल स्वास्थ्य सेवा सहकारी संस्था लि.द्वारा सञ्चालित मनमोहन मेमोरियल मेडिकल कलेज तथा शिक्षण अस्पतालले सम्पत्ति कर नतिरेको र सोको लागि महानगरपालिकाबाट बारम्बार ताकेता भइरहेको भन्ने समाचारप्रति अस्पतालको गम्भीर ध्यानाकर्षण भएको छ’, विज्ञप्तिमा भनिएको छ, ‘अस्पताल प्रशासनले काठमाडौ महानगरपालिकालाई तिर्नु÷बुझाउनुपर्ने सम्पत्ति÷घर जग्गा कर सम्बन्धित वडा कार्यालयमार्फत प्रक्रिया पूरा गरी तिर्दै अघि बढिरहेको कुरा सबैलाई जानकारी गराइन्छ ।’

भ्रामक समाचार फैलाएर अस्पतालको इज्जतमाथि दाग लगाउने प्रयास नगर्न पनि अस्पतालले भनेको छ । यसअघि वीर अस्पतालले पनि महानगरलाई यस्तै जवाफ दिएको थियो ।