गृहमन्त्रीको सक्रियतामा सुन काण्ड दबाइएको ठहर
गृहमन्त्री बालकृष्ण खाँणको सवारी हुँदा अगुवा गाडीमा रहने अंगरक्षक नै सुन काण्डमा सामेल भएपछि समातिएको काण्ड ढिसमिसको अवस्थामा पुगेको छ । गत भदौ पहिलो साता हेडक्वार्टर सँगैको एक नम्बर गणमा थुनिएका वरिष्ठ सई टंक कार्की मन्त्री खाँणको सवारीमा अघिपछि हिँड्ने सुरक्षाकर्मीको अगुवा र पछुवा सवारी साधनको समूहमा कार्यरत थिए ।
सुन काण्ड छरपस्ट भएपछि प्रहरी प्रधान कार्यालयले त्यहाँबाट थुतेर छानबिन गर्न थालेको थियो । यसअघि खाँण रक्षामन्त्री हुँदा पनि उनी सोही समूहमा थिए । गृहमन्त्रीमा नियुक्त भएपछि अगुवा गाडीमा हिँड्न थाले ।
गत असार ९ गते हिमालय एअरलाइन्सको दुबई उडानबाट छ जनाले अर्काको सुन बोकेर आएका थिए । ती सबै भिजिट भीसामा काम गर्न गएका हुन् । काम गर्न नपाएपछि सुन बोकाएर अरुले भरिया बनाई काठमाडौं पठाएको अनुसन्धानबाट खुलेको छ ।
उता काम गर्न गएकाले भाडाको लोभमा सुन बोकेको बयान दिए । नेपाल टेक्नासाथ छ जनामध्ये एक जनाले सुन लिएर अन्तै हिँडेपछि कुरो बाहिरियो । एसएसपी जीवन श्रेष्ठको नेतृत्वमा उनीहरु सबैमाथि अनुसन्धान भयो । उक्त सुन त्यसरी मगाउने काण्डको प्रपञ्च मिलाउने उनै टंक कार्की रहेको यथार्थ पनि खुल्दै गयो ।उताबाट सुन पठाउनेले काठमाडौं पुगेपछि ५० ग्राम सुन हराएको गुनासो गरे । सुन पठाउने आकाश ठकुरी थिए । ५० ग्राम सुनसहित भागेकालाई ठीक पार्ने प्रपञ्च कार्कीले मिलाएको रहस्य खुल्यो । त्यसरी सुन लिएर भाग्ने को थिए भन्नेबारे अरु पाँच जना र आकाशले कार्कीलाई बताएपछि त्यो सुन जम्मा पार्न उनी ज्यान फालेर दौडिएका थिए ।
५० ग्राम सुन नबुझाउनेलाई पक्रेर कार्कीलगायतको समूहले गौशाला वृत्तमा लगी ११ दिन थुनाए । ती व्यक्तिले आफूसँग भएको चार लाख र चेक लुटिएको आरोप लगाए । ती सबै काम उनै कार्कीको योजना र संलग्नतामा भएको प्रहरीको प्रारम्भिक अनुसन्धानबाट पनि खुल्यो ।
त्यो दिन ५० ग्राम सुन बोकेर सरासर विमानस्थलबाट बाहिर गएका व्यक्ति एअरपोर्टबाट सुकेधारा पुगेका थिए । त्यसपछि उनलाई सिभिल ड्रेसका प्रहरीले पक्रे । प्रहरीले पक्रेर ११ दिनसम्म थुनेपछि किन त्यसरी थुनियो भन्ने बारेमा प्रहरी अनुसन्धान केन्द्रित भयो । डिएसपी कार्यरत रहेको वृत्तमा भएको उक्त घटनामा धेरै जना आशंकाको घेरामा तानिए । त्यसमध्ये कार्की प्रमुख योजनाकार प्रमाणित भए ।
प्रहरीले पीडित भनिएकालाई पनि बोलाएर बयान लियो । आफू संलग्न भएको समाचार बाहिरिएपछि मन्त्रीका पिएसओ सबैलाई छुटाउने नयाँ प्रपञ्चमा लागे । प्रहरीले अनुसन्धानमा सम्भव भएसम्मका ठाउँको सिसिटिभी फुटेजसमेत हेर्यो । तर अहिले मन्त्रीको निर्देशनमा सुन काण्डका कार्कीलाई हेर्ने बाहेक कारवाहीमा कलम चोप्न नसकेको बताइन्छ ।
‘यो सबै घटना गृहमन्त्रीले दबाएका हुन्,’ प्रहरी स्रोतलाई उद्धृत गर्दै गृह मन्त्रालयका एक जना अधिकृत भन्छन्, ‘पुष्टि को आधार छैन भनेर घटना सामसुमतर्फ अघि बढ्यो । तीन हप्ता बढीसम्म केही नगर्नु भनेको अब केही नगर्ने भन्ने हो ।’
टिप्पणीहरू