३९ हजार पाउण्ड गायव गरिएको भन्दै एनआरएनएमा हङ्गामा, बेलायतले आइसीसीलाई नमान्ने

विश्वका विभिन्न देशमा रहेका नेपालीहरुको छाता संगठन गैरआवासीय नेपाली संघ (एनआरएनए) मा अन्तरकलह चर्किएको छ । एनआरएनए आइसीसीले बेलायतका अध्यक्ष प्रेम गाहामगरलाई एकाएक बर्खास्त गरेको पत्र सार्वजनिक गरेपछि विवाद छताछुल्ल भएको हो ।

एनआरएन युकेका प्रवक्ता भरतमणि चोङवाङले विज्ञप्ति जारी गर्दै अध्यक्ष गाहामगरलाई हटाउने आइसीसीको निर्णय अवैधानिक भएकोले खारेज गरिएको जानकारी दिए । उक्त पत्र युकेको राष्ट्रिय समन्वय परिषद बैठकले सर्वसम्मत रुपमा खारेज गरेको उनले बताएका छन् ।

आइसीसीको पत्रमा एनआरएन युकेको कार्यसमितिका बहुमत सदस्यले अध्यक्षमाथि अविश्वासको प्रस्ताव राखी पदमुक्त गर्न केन्द्रमा सिफारिस गरी पठाएको उल्लेख थियो । तर, एनआरएन युकेले भने किर्ते हस्ताक्षर गरेर अवैधानिक ढंगले कारवाही गरिएकाले स्वीकार नगर्ने चेतावनी दिएको छ । अध्यक्ष मगरको विपक्षमा भनिएकाहरु नै समर्थनमा रहेकाले आइसीसीले नक्कली हस्ताक्षर बटुलेर बहुमतको झूठो हवाला दिएको विज्ञप्तिमा उल्लेख छ ।

“हराएको ३९ हजार पाउण्ड कहाँ छ,कहिले फर्कन्छ र सो पैसा कसले उपयोग गरिरहेको छ ? के त्यही पैसा ढाकछोपकै लागि यो पदमुक्तको अवैधानिक पत्र लेखेर वातावरण धुमिल्याउने कोसिस गरिएको हो ?’

एनआरएनए बेलायतको विधानमा अध्यक्षमाथि अविश्वासको प्रस्ताव पेश गर्ने व्यवस्था नरहेको र बहुमत देखाउन मताधिकार नभएका राज्य समितिका केही पदाधिकारीको समेत नाम राखेर झूठको खेति गरिएको भरतमणिले दावी गरेका छन् । उनका अनुसार आइसीसीले यूके च्यारिटीका कसैलाई पनि पदमुक्त गर्न सक्ने विधानमा व्यवस्था छैन ।

अध्यक्षमाथिको कारवाहीलाई लिएर शुरु भएको विवाद आर्थिक अनियमितताको घटनामा समेत जोडिएपछि एनआरएनएभित्रको कलह थप छताछुल्ल भएको छ । च्यारिटी संस्थाको खाताबाट हराएको ३९ हजार पाउण्ड स्वतन्त्र छानविन समितिले काम गरिरहेको समयमा त्यसलाई प्रभावित पार्ने आइसीसीले पदमुक्तको पत्र लेखेको एनआरएनए युकेको आरोप छ । प्रवक्ता भरतमणिले आइसीसीमाथि नै छानविन हुनुपर्ने मागसमेत गरे ।

एनआरएन युकेको वार्षिक क्यालेण्डरमा गत ६ अगष्टमा ११ औं साधारण सभा तथा संघसंस्था प्रतिनिधिसभा हुनुभन्दा अघिल्लो हप्ता ३९ हजार पाउण्ड अध्यक्षलाई जानकारी नगराई कोषाध्यक्ष विष्णु खरेलले चलाएका थिए । त्यसबारे छानविन भैरहेकै बेला कारवाहीको विषय ल्याउनुलाई यूकेका नेपालीहरुले घटना ढाकछोप गर्न आइसीसीका ठालुहरुको सुनियोजित चालबाजी भनेका छन् ।

‘आइसीसीको पत्रको बारेमा कसैले चर्चा गरेमा हराएको ३९ हजार पाउण्ड कहाँ छ,कहिले फर्कन्छ र सो पैसा कसले उपयोग गरिरहेको छ ? के त्यही पैसा ढाकछोपकै लागि यो पदमुक्तको अवैधानिक पत्र लेखेर वातावरण धुमिल्याउने कोसिस गरिएको हो?’ विज्ञप्तिमा भनिएको छ, ‘यूकेमा रहेका नेपालीहरु सहिष्णु रहँदै आएका छन् । एकाध खराब व्यक्तिको स्वार्थको निमित्त एनआरएन आईसीसीको गलत क्रियाकलापले सिंगो एनआरएनको इज्जतमा आँच आउने काम भएकोमा खेद प्रकट गर्दछौं ।’