चोलेन्द्रको आक्षेप ‘क्लिएर’ पार्न लौरो टेकेर वृद्ध वकिल सिंहदरबारमा

वयोवृद्ध कानुन व्यवसायी कृष्णप्रसाद भण्डारीसहित कानुन व्यवसायीहरु बयानका लागि संसदीय समितिमा उपस्थित भएका छन् । निलम्बित प्रधानन्यायाधीश चोलेन्द्र समशेर राणाले अनेक आक्षेप लगाएपछि संसदीय समितिले हिजो पत्र लेखेर सोधपुछका लागि बोइलाइएकोमा उनीहरु आज बयान दिन गएका हुन् ।

बयानका लागि वरिष्ठ अधिवक्ता भण्डारीसहित नेपाल बारका पूर्वअध्यक्षद्वय चण्डेश्वर श्रेष्ठ र शम्भु थापा, वरिष्ठ अधिवक्ताहरू हरिहर दाहाल, रमण श्रेष्ठ, ओमप्रकाश अर्याल, गोपालप्रकाश अर्याल र गोपालकृष्ण घिमिरे सिंहदरबार पुगेका छन् । प्रतिनिधिसभा विघटनविरुद्धको मुद्दामा बहस गरेका वरिष्ठ अधिवक्ता भण्डारीलाई तत्कालीन प्रधानमन्त्री केपी शर्मा ओलीले ‘बाजे वकिल’ भनि व्यङ्ग्य गरेका थिए । उनै भण्डारी आज लौरो टेकेर समितिमा बयान दिन गएका छन् ।

चोलेन्द्रले पोलेका बहालवाला र पूर्वन्यायधीशहरुले भने बयानमा जान अस्वीकार गरेका छन् । समितिले पूर्व प्रधानन्यायाधीशहरु कल्याण श्रेष्ठ, सुशिला कार्की, मीनबहादुर रायमाझीसहित पूर्व न्यायाधीशहरुलाई पनि पत्र पठाएर बयानका लागि उपस्थिति हुन भनेको थियो ।

आफूविरुद्धको महाभियोग प्रस्तावको सफाइका लागि समितिमा बयान दिनेक्रममा चोलेन्द्रले सर्वोच्च अदालतका केही बहालवाला न्यायाधीश, पूर्व प्रधानन्यायाधीश, बारका पूर्वपदाधिकारी, वकिल, दलका नेता, पत्रकारलगायतलाई असान्दर्भिक प्रसंगमासमेत जबर्जस्ती मुछेको आरोप लागेको छ ।