वाशिङटन नजिकै गोली प्रहार, घरभित्र पाँच जनाको शव

संयुक्त राज्य अमेरिकाको राजधानी वाशिङटन नजिकैको मेरिल्याण्ड राज्यमा भएको गोली प्रहारको घटनामा पाँच जनाको ज्यान गएको छ । स्थानीय सेसिल काउन्टीको एक घरमा स्थानीय समयानुसार हिजो पाँच जना मृत अवस्थामा फेला परेका छन् ।

दुई वयस्क र तीन बालबालिका मारिएको अवस्थामा फेला परेका प्रहरीले जनाएको छ । काउन्टी कार्यालयका अनुसार एक पुरुषले हिजो बिहान ९११ मा फोन गरेर प्रहरीलाई तीन बालबालिका र एक महिलालाई गोली लागेर मृत्यु भएको जानकारी दिएका थिए ।

त्यसपछि उक्त निवासमा पुगेका सुरक्षाकर्मीहरुले मृतक पाँच जनाको शव घरभित्र विभिन्न स्थानमा फेला पारेको बताइन्छ । अमेरिकामा गोली प्रहारबाट वर्षेनी हजारौंको ज्यान जाने गरेको छ ।