युएईमा ३० दिनमा २४ नेपालीले ज्यान गुमाए

वैदेशिक रोजगारीको निम्ति आकर्षक गन्तव्य मानिएको युनाइडेट अरब इमिरेट्स (युएई) मा एक महिनामा २४ जना नेपाली श्रमिकको ज्यान गएको छ । त्यहाँस्थित नेपाली दूतावासका अनुसार यो तथ्याङ्क गत साउन महिनाको मात्रै हो ।

ज्यान गुमाउनेहरू वैदेशिक रोजगारीको सिलसिलामा युएई गएका नेपालीहरू हुन् । गत आर्थिक वर्ष २०७८÷७९ मा वैदेशिक रोजगारीको सिलसिलामा युएई गएकामध्ये १ सय ७४ जनाले ज्यान गुमाएका थिए ।

मृत्यु हुनेहरूमध्ये एक सय ६७ जनाको शव नेपाल ल्याइएको थियो । सात जनाको अन्तिम संस्कार युएईमा नै गरिएको बताइएको छ ।

युएईमा गत आर्थिक वर्ष २०७८/७९ मा मृत्यु भएकाहरूको परिवारलाई सम्बन्धित कम्पनीले क्षतिपूर्ति स्वरूप ३२ लाख ७५ हजार ७६३ युएई दिराम प्रदान गरेको छ ।