अमेरिकामा प्रवासी एकता मञ्चको सम्मेलन, व्यस्तताका कारण माधव नेपाल नजाने

नेकपा एकीकृत समाजवादीको प्रवास संगठन प्रवासी नेपाली एकता मञ्च अमेरिकाको राष्ट्रिय सम्मेलन हुने भएको छ । ‘सामाजिक अभियानमा सहभागी बनौं’ भन्ने नाराका साथ सम्मेलन असोज १ र २ गते न्यूयोर्कमा गर्न लागिएको बताइएको छ ।

राष्ट्रिय सम्मेलनमा एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपाललाई प्रमुख अतिथिको रुपमा अमेरिका बोलाइएको छ । तर मङ्सिर ४ को चुनावी तयारीलगायतको व्यस्तताले नेपाल उता जाने सम्भावना नरहेको आयोजकले जानकारी दिएको छ । ‘उहाँले जुम मार्फत सम्मेलनको उद्घाटन गर्नुहुनेछ,’ मञ्चका अध्यक्ष टेक गुरुङले बताए ।सम्मेलनमा अमेरिकामा रहेका नेपाली समुदायलाई कसरी सशक्त बनाउने भन्नेमा हामी जोड दिइने जानकारी पनि गराइएको छ । सोही कारण हाइस्कूलमा अध्ययनरत विद्यार्थीलाई पनि प्रोत्साहन गर्न वक्ताको रुपमा राखिएको उनले बताए । ‘हामी पहिलो पुस्ता र नयाँ पुस्ताबीचको सोचमा नै फरक छ । त्यसलाई सम्बोधन गर्न हामी उद्घाटन कार्यक्रम हाइटेक र छरितो बनाउने योजनामा छौं,’ अध्यक्ष गुरुङको भनाइ छ ।

सम्मेलन आयोजनाका लागि एक सय एक सदस्यीय आयोजक समिति तथा विभिन्न दश वटा विभाग गठन गरिएको छ । २५ राज्यबाट एक सयभन्दा बढी प्रतिनिधिले सम्मेलनमा भाग लिने र नयाँ नेतृत्व चयन गरिने महासचिव शंकर पन्तले जानकारी दिए ।