निर्वाचन आयोगलाई अदालतसम्म तान्न कस्सिए कमल थापा
निर्वाचन आयोगले चुनाव चिन्ह ‘गाई‘ नदिएको भन्दै राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले अदालत जाने चेतावनी दिएका छन् । थापाले सामाजिक सञ्जाल फेसबुकमार्फत निर्वाचन आयोगविरुध्द अदालत जाने बताएका हुन् ।
उनले कानुनअनुसार चुनाव चिन्ह छान्ने अधिकार राजनीतिक दलको भएको बताएका छन् । थापाले पटकपटक ‘गाई‘ चिन्ह अद्यावधिक गर्न दिइएको निवेदनलाई आयोगले उपेक्षा गरेको आरोप लगाए ।
सर्वोच्च अदालतको अन्तरिम आदेशको समेत अवज्ञा गर्नुमा निर्वाचन आयोगको बदनियत देखिएको बताउँदै उनले सामाजिक सञ्जालमा लेखेका छन्, ‘कानुनअनुसार चुनाव चिन्ह छान्ने अधिकार राजनीतिक दलको हो । राप्रपा नेपालले पटकपटक ‘गाई‘ चिन्ह अद्यावधिक गर्न दिएको निवेदनको उपेक्षा गर्नु र सर्वोच्च अदालतको अन्तरिम आदेशको समेत अवज्ञा गर्नुमा निर्वाचन आयोगको बदनियत देखिन्छ । आयोगको स्वेच्छाचारिताविरुद्ध न्यायको निम्ति हामी अदालत जानेछौँ ।‘
टिप्पणीहरू