राष्ट्रपतिको पत्र च्यातेर देखाउन गोकुल बाँस्कोटाको चुनौती

नेकपा एमालेका नेता तथा पूर्वमन्त्री गोकुलप्रसाद बाँस्कोटाले राष्ट्रपतिले संसदमा फिर्ता पठाएको नागरिकता विधेयकको पत्र गलत भए च्यातेर देखाउन चुनौती दिएका छन् । आज बसेको प्रतिनिधिसभा बैठकमा बोल्दै बाँस्कोटाले संविधानबमोजिम नै राष्ट्रपतिले उक्त विधेयक सदनमा पुनः सुधारको निम्ति पठाएको बताएका हुन् ।

विश्वका अधिकांश देशमा नागरिकताको विषयलाई सस्तो बनाउने कुरा नरहेको उल्लेख गर्दै छिमेकी देशहरुबाट भए पनि सिकेर यो विषयमा गम्भीर छलफल हुन आवश्यक रहेको बताए । नेता बाँस्कोटाले सत्तारुढ गठबन्धनको गलपासोका रुपमा उक्त विधेयकलाई धुलिसात गर्ने काम भएको आरोप लगाएका छन् ।

हतार हतारमा नागरिकता विधेयक ल्याउनु गलत रहेकाले यसबाट जनताको आवाज नसुनिएको उनको जिकीर छ । ‘हतार हतारमा नागरिकता विधेयक ल्याउनु गलत छ । यसले लोकतन्त्रको प्रतिनिधित्व गर्दैन, जनताका आवाज सुन्दैन,’ नेता बाँस्कोटाले भने, ‘सत्ता गठबन्धनको गलपासोका रुपमा नागरिकता विधेयकलाई पिस्ने र देशलाई विभाजित गर्ने किसिमले जानुहुँदैन । पछि यसका दूरगामी परिणाम देखिनेछन् ।’

भेग, क्षेत्र, अनुहारको रङ र लिङ्गको आधारमा नागरिकता दिन नहुने नेता बाँस्कोटाको भनाइ छ । सत्ताधारी दलहरुले प्रतिपक्षले रङ फेरेको आरोप लगाएको भन्दै रङ प्रतिपक्षले नभइ सत्तापक्षले नै फेरिरहेको दाबी उनको छ ।