प्रचण्डको बाबुरामसँग, प्रधानमन्त्रीको प्रचण्डसँग साउती सल्लाह

आगामी निर्वाचनमा हुने गठबन्धन, सरकार सञ्चालन,शीतल निवासमा अड्केको नागरिकता विधेयकलगायतका विषय थप पेचिलो बन्दै गएपछि राजनीतिक दलका शीर्ष नेताहरुबीच भेटघाट भइरहेको छ । पछिल्लो पटक सोही विषयमा खुमलटार र बालुवाटारमा तारन्तार बैठक भएको बताइन्छ ।

ललितपुरको खुमलटारस्थित माओवादी अध्यक्ष पुष्पकमल दाहाल प्रचण्ड निवासमा हिजो पूर्व प्रधानमन्त्री तथा नेपाल समाजवादी पार्टीका अध्यक्ष डा. बाबुराम भट्टराईबीच भेटवार्ता भयो । उहाँहरुबीच बिहानको समयमा करीब ४५ मीनेट कुराकानी भएको थियो ।

बिहान निवासमा अन्य नेता तथा कार्यकर्तासँग भेटवार्ता गर्नुभएका प्रचण्ड हिजो दिउँसो प्रधानमन्त्री शेरबहादुर देउवासँग कुराकानी गर्न बालुवाटार पुग्नुभएको हो । उहाँ र प्रधानमन्त्रीबीच दिउँसो सवा घण्टा लामो छलफल भएको बताइन्छ ।