स्वास्थ्य बिमा गठबन्धन सरकारले ‘कोल्याप्स’ पार्न लागेको एमाले सांसदको आरोप

नेकपा एमालेका नेता तथा पूर्वमन्त्री खगराज अधिकारीले स्वास्थ्य बिमा कार्यक्रम सरकारले सिध्याउन लागेको भन्दै आपत्ति जनाउनु भएको छ । आज बसेको प्रतिनिधि सभाको बैठकमा उहाँले सरकारकै कारण स्वास्थ्य बिमा कार्यक्रम जोखिममा परेको आरोप लगाउनु भएको छ ।

एचआइभी एड्स सङ्क्रमित, ज्येष्ठ नागरिक, अपाङ्गता भएका नागरिकको स्वास्थ्यमाथि खेलबाड गर्न खोजिएको भन्दै अधिकारीले सभामुखमार्फत सरकारलाई रुलिङ गर्न माग गर्नुभएको हो ।

स्वास्थ्य बिमा कार्यक्रमअन्तर्गत विमितहरूबाट ११ अर्ब रुपैयाँ संकलन भएको बताउँदै अधिकारीले उक्त कार्यक्रमलाई सरकारले अप्ठेरो अवस्थामा पुर्याएको आरोप लगाउनुभएको छ । सरकारकै कारण सम्पूर्ण सरकारी अस्पताल र प्रतिष्ठान स्वास्थ्य बिमा कार्यक्रमको सेवा बन्द गर्ने अवस्थामा पुगेको उहाँको ठहर छ ।

अधिकारीले, ‘ज्येष्ठ नागरिक, अपाङ्गता भएकाहरूको सरकारले हुर्मत लिन लागेको हो ? भन्दै प्रश्न गर्नुभएको छ । तत्कालीन एमाले सरकारले लागु गरेको एक मात्र समाजवादउन्मुख कार्यक्रम स्वास्थ्य बिमा गठबन्धन सरकारले ‘कोल्याप्स’ पार्न लागेको उहाँको भनाइ छ ।