अमेरिका–चीन–ताइवान तनावको बाछिटा दक्षिण एशियासम्म

अमेरिकी सभामुख नेन्सी पेलोसीले अघिल्लो मंगलबार गरेको २४ घण्टे ताइवान भ्रमणपछि प्रशान्त महासागरीय क्षेत्रमा बढेको तनावको असर दक्षिण एशियामासमेत देखिन थालेको छ । चीन ‘एक चीन नीति’ को पक्षमा विश्वमत बटुल्न व्यस्त रहेको बेला दक्षिण एशियाको प्रमुख राष्ट्र भारतको भूमिका ‘सन्देहपूर्ण’ रहेको अन्तर्राष्ट्रिय सञ्चार माध्यमहरुले बताएका छन् ।

भारतकै कारण श्रीलंकाले त्यहाँ पुगेको एउटा चिनियाँ जहाजलाई बन्दरगाहमा पस्न नदिएको घटनालाई ताइवान तनावको रुपमा व्याख्या गरिएको छ । चीनको युआन वाङ ५ पानी जहाजलाई श्रीलंकाको हम्बनटोटा बन्दरगाहमा रोक्न नदिइएको घटनालाई चीनले पनि सुक्ष्म रुपमा विश्लेषण गरेको बताइन्छ । पश्चिमा सञ्चारमाध्यमहरुले उक्त जहाज जासुसी प्रयोजनमा खटाइएको उल्लेख गरेका छन् भने चीनले महामारी रोक्न प्रयोग गरिने स्वास्थ्य सामग्री र उद्धार टोली बोकेको जहाज भएको जानकारी दिएको छ ।

यता चिनियाँ विदेशमन्त्री वाङ यीले ताइवान प्रकरणमा भारतबाहेक दक्षिण एशियाका नेपाल, अफगानिस्तान, बङ्गलादेश,माल्दिभ्स, म्यानमार,पाकिस्तान र श्रीलंकासहित सयभन्दा बढी मुलुकले एक चीन नीतिप्रति दृढ प्रतिबद्धता जनाएको जानकारी दिनुभएको छ । उहाँले हिजो आयोजित पत्रकार सम्मेलनमा उक्त कुरा बताउनुभएको हो ।