रुकुम घटनाको चौथो शव भेटियो « Jana Aastha News Online
Logo
१२ माघ २०७८, बुधबार
|  Wed Jan 26 2022
Logo
१२ माघ २०७८, बुधबार
|  Wed Jan 26 2022

रुकुम घटनाको चौथो शव भेटियो

प्रकाशित मिति :  १४ जेष्ठ २०७७, बुधबार १६:५८


गत वैशाख १७ गते राति प्रेमिका भगाउने गरी जाजरकोटको भेरी नगरपालिका–४ रानागाउँबाट नवराज विक रुकुम पश्चिमको चौरजहारी नगरपालिका–८ सोती गाउँ पुगेका थिए । ठकुरी युवतीसँग ३ वर्ष चलेको भनिएको प्रेम चक्करलाई विवाहमा परिणत गर्न खोज्दा उनी प्रहरीमा त्यतिबेलै ठक्करमा परेका थिए ।

युवतीका बुबासँगको विवाद हात हालाहालको अवस्थामा पुग्दा केही गाउँले युवाको कुटाइसँगै प्रहरीमा बुझाइएका थिए उनी । एक रात चौरजहारीस्थित प्रहरी खोरमा बसेका उनी लडकडाउनमा अर्काको गाउँ नपस्ने सर्तमा आमाको जिम्मा लगाइएका थिए । प्रेमिका लिन आउँदा पाएको कुटाइ, जातभातको नाममा खाएको तथानाम गाली, प्रहरीसम्म पुग्दा सुन्नुपरेको लकडाउन उल्लंघनको आरोप नवराजलाई बिझेको थियो । उनलाई समातेर कुट्ने स्थानीय र प्रहरीलाई बोलाउने जनप्रतिनिधिप्रति बदलाभाव थियो र देखाइदिन चाहन्थे साँचो प्रेम कसैले टुटाउन सक्दैन भनेर । १० गते शनिबारका दिन जसरी पनि अस्ति आफूलाई कुट्नेलाई ठिक पारेरै पनि केटी भगाउने भन्दै नवराज फेरि केटीको गाउँ सोती पुगे, १८ जना थप साथी लिएर । जाजरकोट र सोती जान बनाइएको पुल नतर्दै युवतीका आफन्तलाई खबर पुगेको थियो, ‘१८÷२० जना आएका छन्, गाउँमा केही नराम्रो गर्छन् कि !’ भनेर ।

स्थानीय रेशम मल्ल भन्छन्, ‘५ बजेतिर गाउँ पसेको हुन्, अस्तिना आएको बेला हातपात गर्नेमध्ये विनोद मल्लको घर खोज्दै थिए । उनको घर लिन आएकी भनिएकी युवतीको घरभन्दा अलिकति पर पर्छ । विनोदको घर पुगेर सोधे, घरमा छैन भनेपछि नम्बर मागे । उनकी आमाले साथी भए त नम्बर तिमीहरू सँगै हुनुपर्ने भनिन् । उनीहरू केहीबेर युवतीको घरभन्दा अलि तल रहेको डाँडामा बसे । फेरि बाटोमा झरेर नाउलामा पानी पिए । ती युवतीको आमाले केटाको संख्या बढी देखेपछि वडाध्यक्षलाई खबर गरिन् । वडाध्यक्षले पुलिसलाई खबर गरेछन् । एककान दुईकान हुँदै जाजरकोटबाट केटाहरू ठूलो संख्यामा आएको भन्दै गाउँले जम्मा भए । छोपेर प्रहरीमा बुझाउने भन्दै बाटोमा झरे । कालेगाउँ पुलमा पनि मान्छे थिए, उनीहरू पाल्लोपट्टिका भएकाले के रै’छ भन्दै हेर्न आएका थिए । यताबाट गाउँले ओर्लिए । केटा अत्ताल्लिएर भेरी नदीतर्फ गए, गाउँलेले पिछा गरे, केहीलाई समातेर प्रहरीलाई बुझाए, केही हामफाले । त्यहाँका स्थानीय अरूको पनि भनाइ ठ्याक्कै यस्तै छ ।

यता, जाजरकोटबाट आएका केही युवाको भनाइमा कसैको घर सोध्दै हिँडेका थिएनन् । नवराजकै गाउँले साथी सुदीप खड्का भन्छन्, ‘हामीलाई देख्नेबित्तिकै केटीको आमाले जोडजोडले चिच्याउँदै गाली गरिन्, ‘डुम’हरू कसकी छोरी बुहारी उठाउन आए फेरि भन्दै कराइन् । हामी त डरायौँ, गाउँले एकैछिनमा चारैतिर जम्मा भए । हामीलाई यो प्रेम सम्बन्धबारे पहिलेको अवस्था थाहा थिएन, केटीको घर नपुग्दै फर्कियाँै । फर्कन लाग्दा सारा गाउँलेले लखेट्न थाले, हातमा ढुंगामुडा थिए । पर पुलमा मान्छे थिए । भाग्दै गयौँ, लखेट्दै गए । कसैलाई छोपे, केही भेरीमा हाम फाल्यौँ ।’

गाउँलेको समूहले करिब आधा घण्टासम्म ढुंगामुढा गर्दै लखेटेको नवराजसँगै गएका अर्का युवा सरोज भँडेलले बताए । उनीहरूले टार्गेट पारेका थिए नवराजलाई । ढुंगाले हानेर मारेपछि भेरी नदीमा फालिदिएको उनको दाबी छ । आफूहरूले नदीमा हामफाले पनि ढुंगामुढा गर्न नछाडेको उनको भनाइ छ । हामीमाथि आक्रमण भइरहँदा प्रहरी पुगिसकेको थियो । कुट्नेहरू देख्दादेख्दै हामीलाई नै समायो, कुनै पनि एक्सन लिएन । गाउँलेलाई केही गरेन, हामीलाई ल्याएर चौरजहारी आयो ।

मृतक गणेश, टिकाराम र नवराज

२० वर्षीय नवराज विक र १७ वर्षीया मल्ल थरकी ती युवती अन्तरजातीय प्रेम सम्बन्धको कारण नवराजसँगै चार जनाको ज्यान गएको छ । चारै जनाको शव भेरी नदीमा भेटिएको हो । अझै दुई जना बेपत्ता छन्, आफन्तजनले ज्यूँदो हुने आशा मारिसकेका छन् ।

नवराजले न घरमा दुलही ल्याए, न त घर फर्किए । उनलाई साथ दिन सँगै गएका अन्य ३ जनाको ज्यान गयो । नवराजको शव शनिबार राति चौरजहारी–१ का टीकाराम विकको शव आइतबार र गणेश बुढाको शव सोमबार भेटिएको प्रहरीले जनाएको छ । त्यसैगरी, भेरी नगरपालिका–११ का १८ वर्षीय लोकेन्द्र सुनारको शव बुधबार दिउँसो भेटिएको छ । उनको शव चौरजहारी–१ स्थित चौरजहारी अस्पतालको नजिक रहेको अधेरे भन्ने ठाउँमा फेला परेको आफन्तजनले बताएका छन् ।

भेरी नगरपालिका–११ गोविन्द शाही र वडा नंं. ४ का सन्दीप विक बेपत्ता छन् । नेपाल प्रहरी, सशस्त्र प्रहरी बल र सेनाको टोलीले उनीहरूको खोजी गरिरहेको छ ।

मृतकका परिवारले सोही वडाका अध्यक्ष डम्बरबहादुर मल्लको नेतृत्वमा गाउँलेले लखेटीलखेटी मारेको आरोप लगाएका छन् । उनीहरूले घटनामा संलग्नमाथि कारबाही र क्षतिपूर्ति माग गर्दै मंगलबार जाजरकोट प्रहरी कार्यालयमा किटानी जाहेरी दिएको र रुकुम प्रहरीको कार्यक्षेत्राधिकार परेकाले रुकुम पठाइएको जाजरकोटका प्रहरी प्रमुख डीएसपी किशोरकुमार श्रेष्ठले बताए । रुकुम पश्चिमको प्रहरीसँग समन्वय गरी घटनाको अनुसन्धान शुरु भएको डिएसपी श्रेष्ठले जानकारी दिए । जिल्ला प्रहरी कार्यालय रुकुम पश्चिमले त्यहाँका वडाध्यक्ष मल्लका साथै केटी, केटीका बुवा, आमा, दाइसहित १२ जनालाई पक्राउ गरिएको र अन्यको खोजी भइरहेको जनाएको छ ।

सोतीका गाउँलेले लखेटी लखेटी भेरीमा हामफाल्न बाध्य पारेको प्रहरीको प्रारम्भिक बुझाइ छ । तर, भेरीमा फेला परेको लासको अवस्था हेर्दा मारेरै फालेको मृतकका आफन्तजनको दाबी छ । डुबेर मरेको भए शव फुलेको हुनुपर्ने, टाउको र निधारमा गहिरो चोट नहुनुपर्ने उनीहरूको भनाइ छ । दलित समुदायका युवा र ठकुरी समुदायकी युवतीको प्रेम सम्बन्धको कारण रुकुम पश्चिममा भएको घटनाले यतिबेला सडक र संसद् तातिएको छ ।

घटनास्थल भेरी नदी


प्रतिक्रिया दिनुहोस !