माधव नेपालले लड्ने अन्तिम चुनाव

नेकपा (एकीकृत समाजवादी) का अध्यक्ष माधवकुमार नेपालले मङ्सिरमा हुने संघ तथा प्रदेशको निर्वाचनमा अहिलेको पाँच दलीय गठबन्धन कायमै राखेर त्यसभित्र तेस्रो मोर्चा बनाउने बताउनुभएको छ ।

ढाकाराम सापकोटाद्वारा लिखित पुस्तक ‘नेपाल कम्युनिष्ट पार्टी एमाले र माओवादी केन्द्रको एकतादेखि विभाजनसम्म’ पुस्तक लोकार्पण गर्दै उहाँले गठबन्धनभित्र कांग्रेसलाई एकलौटी गर्नबाट रोक्न बाँकी चार पार्टीबीच छुट्टै मोर्चा गठनको आवश्यकता औंल्याउनु भएको हो ।

“कांग्रेसलाई मै हुँ सर्वेसर्वा भन्ने छ । हामीलाई पनि केही हौं भनेर देखाउनु छ,’

‘माओवादी,जसपा,एस, जनमोर्चासहित चार पार्टी गोलबद्ध हुँदैछौं । कांग्रेसलाई मै हुँ सर्वेसर्वा भन्ने छ । हामीलाई पनि केही हौं भनेर देखाउनु छ,’ अध्यक्ष नेपालले भन्नुभयो ।

नेपालले यो चुनाव व्यक्तिगतरुपमा आफ्नो लागि अन्तिम हुने घोषणासमेत गर्नुभएको छ । उमेरले राजनीतिबाट बिदा लिनुपर्ने अवस्था भए पनि भर्खरै मात्र नयाँ राजनीतिक यात्रा थालेकाले अहिले भने आफू निर्वाचन लड्ने तयारीमा रहेको उहाँले बताउनुभयो ।

‘चुनावमा उठेन भने मानव नेपाल हारेर भाग्यो भन्लान् । त्यसैले यो चुनावमा उठ्नै पर्छ’, अध्यक्ष नेपालले भन्नुभयो, ‘अब पाँच वर्षपछि सन्यास लिनुपर्ला !’