विप्लव अदालत नजाने, सशक्त प्रतिकार गर्ने
नेत्रविक्रम चन्द विप्लव नेतृत्वको नेपाल कम्युनिष्ट पार्टीले देशलाई पुनः द्वन्द्वमा धकेल्न खोजिएको भन्दै त्यसको सशक्त प्रतिकार गर्ने चेतावनी दिएको छ ।
ललितपुर जिल्ला अदालतले विभिन्न चार वटा मुद्दामा महासचिव विप्लवसहित नेता-कार्यकर्तालाई आज पक्राउ पुर्जी जारी गरेपछि प्रवक्ता खड्गबहादुर विश्वकर्मा “प्रकाण्ड”ले यस्तो चेतावनी दिएका हुन् । आज अपराह्न विज्ञप्ति जारी गर्दै उनले अदालतले जारी गरेको पुर्जीलाई शान्ति प्रक्रिया भाँड्ने र देशलाई पुन: दद्वन्द्वमा धकेल्ने कदम भनेका छन् ।
विज्ञप्तीमा भनिएको छ, ‘सरकारसँग वार्ता जारी रहेको अवस्थामै अदालतबाट यस्तो सूचना जारी हुनु सरकारको शान्ति प्रक्रिया भाँड्ने, देशलाई पुनःद्वन्द्वमा धकेल्ने कदम हो । सरकारसँग वार्तापछि भएका सहमति कार्यान्वयनको चरणमै छ । सहमतिअनुसार सरकारले काम गरिरहेको छैन ।’
ललितपुर अदालतले नेकपाका नेता-कार्यकर्तामाथि लागेका मुद्दाहरूमा म्याद बेपत्ते तामेल भएको भन्दै ६ साउन ०७९ को आदेशअनुसार मुलुकी फौजदारी कार्यविधि संहिता २०७४ को दफा ५८ को १३ अनुसार ३५ दिने पक्राउ पुर्जी जारी गरेको हो ।
प्रचण्ड नेतृत्वको माओवादीबाट बिद्रोह गरी सशस्त्र संघर्षमा होमिएको विप्लव समूह २०७७ साल फागुन २० गते तत्कालीन सरकारसँग तीन बुँदे सहमति गरेर शान्तिपूर्ण राजनीतिमा फर्किएको थियो । उक्त सहमतिको तेस्रो तथा अन्तिम बुँदामा जेलमा रहेका उसका कार्यकर्ता रिहाइ गर्न र मुद्दा फिर्ता लिन सरकार तयार रहेको उल्लेख छ ।
त्यसअघि हिंस्रक घटना घटाएको सो समूहविरुद्ध देशैभरि उजुरी परेका थिए । तर,अझै पनि मुद्दा फिर्ता भएका छैनन्, जसका कारण अदालतले समय-समयमा उनीहरूविरुद्ध पक्राउ पुर्जी जारी गर्दै आएको छ।
टिप्पणीहरू