बालुवाटारमा प्रचण्ड दुई चोटी,खुमल्टारमा प्रचण्ड दुई चोटी
राष्ट्रिय राजनीतिका निर्णायक मोडहरुमा निकै सक्रिय रहने नेकपा माओवादी केन्द्रका अध्यक्ष पुष्पकमल दाहाल प्रचण्ड पछिल्ला दिन तुलनात्मक रुपमा झन व्यस्त देखिनुभएको छ । वर्तमान सत्ता गठबन्धन बनाउन मुख्य भूमिका खेल्नुभएका उहाँ स्वयम् दैनिकजसो प्रधानमन्त्री भेट्न बालुवाटार जाने गर्नुभएको छ ।
स्थानीय चुनावपछि माओवादी र नेकपा एकीकृत समाजवादीका केही नेताले एमालेसँग सहकार्यनिम्ति लबिङ थालेपछि गठबन्धनको भविष्यलाई लिएर अनेक टिकाटिप्पणी र आशंका बढिरहेका बेला प्रचण्डसँगको भेटघाट झन् बाक्लिएको हो । त्यस्तै, पार्टीमा पदाधिकारी चयन, प्रतिनिधिसभामा दर्ता भएको नागरिकता विधयेक, चिनियाँ विदेश विभागका प्रमुखको नेपाल भ्रमणले पनि प्रचण्डलाई व्यस्त बनाएको छ ।
हिजोमात्रै उहाँ झन्डै आधा दर्जन भेटघाटमा सहभागी हुनुभयो । बिहानै आफ्नै निवास खुमलटारमा पार्टी नेताहरु नारायणकाजी श्रेष्ठ र शिक्षामन्त्री देवेन्द्र पौडेलसँग केहीबेर कुराकानी गर्नुभएका प्रचण्डलगत्तै प्रधानमन्त्री भेट्न बालुवाटार पुग्नुभएको थियो । प्रधानमन्त्रीसँग पौने घण्टा बातचित गरेर निवास फर्केलगत्तै अपराह्न पार्टीका नेता नारायणकाजीसँग फेरि उहाँको कुराकानी भएको थियो ।
खुमलटारमा नारायणकाजीसँग कुरा सकेर प्रचण्ड साँझ फेरि बालुवाटार हान्निनुभयो । बालुवाटारमा प्रधानमन्त्री शेरबहादुर देउवासँग २५ मीनेट गोप्य सल्लाह सकेपछि त्यहि थलोमा एकीकृत समाजवादीका अध्यक्ष माधवकुमार नेपाल, जनता समाजवादी पार्टी (जसपा) का अध्यक्ष उपेन्द्र यादव र संघीय परिषद्का अध्यक्ष डा. बाबुराम भट्टराई मिसिनुभयो । गठबन्धनका पाँच शीर्ष नेताले सरकारको एक वर्षे कार्यकालको समीक्षासहित पछिल्लो राजनीतिक परिस्थिति र गठबन्धन थप बलियो बनाउनेबारे छलफल गरेको बताइएको छ ।
यता, हिजै लैनचौरमा सभामुख अग्नि सापकोटा र माओवादी केन्द्रका नेता लीलामणि पोखरेलबीच बिहान तीन घण्टा भेटवार्ता भएको थियो । उहाँहरु बीच के विषयमा कुराकानी भएको हो भन्ने कुरा खुलाइएको छैन ।
टिप्पणीहरू