एन्फाका पदाधिकारीलाई विश्वकप खेलाउने देशबाट शुभकामना

अखिल नेपाल फुटबल संघ (एन्फा) का नवनिर्वाचित पदाधिकारीलाई फिफा विश्वकप २०२२ आयोजक राष्ट्र कतारको फुटबल संघले बधाई तथा शुभकामना दिएको छ ।

असार ६ गते भएको एन्फा चुनावमा निवर्तमान अध्यक्ष कर्माछिरिङ शेर्पालाई छ मतले पराजित गर्दै पंकजविक्रम नेम्वाङ अध्यक्षमा निर्वाचित भएका थिए । पंकज अध्यक्षमा निर्वाचित भएको नौ दिनपछि बुधबार पत्र लेख्दै कतार एफएले सफल कार्यकालको शुभकामनासहित सहकार्य गर्न तयार भएको प्रतिक्रिया दिएको हो ।

हाल कतार एफएले नेपाललाई सहिद स्मारक ‘ए’ डिभिजन लिगको स्पोन्सर र नेपाली राष्ट्रिय फुटबल टोलीको कतारमा तयारी व्यवस्थासहित घाइते खेलाडीको अस्पेटार अस्पतालमा उपचार गराउन सहयोग गर्दै आएको छ ।

यस्तै, उसले राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीलाई समेत नेपालमा अनुदानमा प्रशिक्षण दिन पठाएको हो ।