हेटौँडाको नगरसभाः एमालेसँग उधारो सहमतिपछि नीति तथा कार्यक्रम घोषणा
नेकपा एमालेका बहुसंख्यक सदस्यको उपस्थिति नरहेपछि दुई पटकसम्म रोकिएको हेटौँडा उपमहानगरपालिकाको ११ औँ नगरसभा आज स्थानीय मोटल एभोकाडो रिसोर्टमा सम्पन्न भएको छ । यसअघि रोयल पार्टी प्यालेसमा अस्ति र आज बिहान १० बजेका लागि दुईपटक सभा आह्वान भएको थियो ।
नेकपा एकीकृत समाजवादीकी मेयर मीना लामाको कार्यपालिकामामा निहीत अधिकार कटौती गर्ने संशोधन प्रस्ताव पेस गरेको एमालेले अवरोध गरेको सभा आपसी छलफलपछि अघि बढेको हो । स्रोतका अनुसार अहिलेलाई संशोधन प्रस्तावलाई थाँती राखेर सभापछि पुनः कानूनी परामर्शसमेत लिएर अघि बढ्न सत्तापक्ष र प्रतिपक्षबीच सहमति भएको हो ।
सहमति नभएमा नगरसभा सञ्चालन कार्यविधिअनुसार ‘पेलेर’ अघि बढ्ने तयारी मेयर लामा नेतृत्वको गठबन्धनको थियो । कार्यविधिले पटक पटक नगरसभा मेयरको तर्फबाट आह्वान गर्दा पनि अनुपस्थित भएमा २५ प्रतिशत सदस्यलाई समेत वैधानिकता मान्ने व्यवस्था रहेको बताइएको छ । नगरसभामा एमाले एक्लैको बहुमत छ । जसका कारण कार्यपालिकामा पनि एमालेकै बहुमत छ ।
एमालेले कार्यपालिका बैठकमा मत विभाजन हुँदा मेयरसहितको बहुमतको निर्णय सदर हुने भन्ने व्यवस्थालाई संशोधन गरी ‘मेयरसहित’ हटाएर बहुमतको निर्णय मान्य हुने व्यवस्था गर्न माग गरेको छ । तर, एमालेले यसरी संशोधन माग गरिरहे पनि मेयरलाई घुर्काएर राम्रा समितिहरुमा आफ्नो उपस्थिति र सक्रियता बढाउने रणनीति लिएको बुझिएको छ ।
पटक पटक नगर सभा हुन नदिँदा जनतामाझ पार्टीप्रति नराम्रो धारणा जाने भएकाले एमालेमा पनि सभा गर्न दिने कि नदिने भन्नेबारे मत विभाजन भएको स्रोतको दाबी छ । आइतबार दिउँसो भएको नगरसभामा नगर उपप्रमुख राजेश बानियाले २ अर्ब ७१ करोड ७९ लाख रुपैयाँ बराबरको बजेट सार्वजनिक गर्नु भएको छ ।
टिप्पणीहरू