राजनीतिको साँचो माओवादीको हातमा रहेको प्रचण्डको दाबी

नेकपा (माओवादी केन्द्र) का अध्यक्ष पुष्पकमल दाहाल प्रचण्डले स्थानीय तहको निर्वाचनले आफ्नो पार्टीलाई देशको राजनीति कता लैजाने भन्ने निर्णायक भूमिकामा पुर्याएको दाबी गर्नुभएको छ ।

आज स्थानीय तहको निर्वाचनमा माओवादीबाट विजयी ललितपुरका जनप्रतिनिधिको प्रशिक्षण भेलामा बोल्दै उहाँले अहिलेको अवस्थामा पार्टीले एक सय २२ पालिका जित्नु ठूलो कुरा भएको बताउनुभयो । यही जनमत नै देशको राजनीतिको बागडोरलाई दिशा दिने साँचो भएको अध्यक्ष प्रचण्डको भनाइ छ ।

‘हाम्रो पार्टीले सोचेजस्तो परिणाम आएन । कम्तीमा पनि ठीक ढंगले जाँदा एक सय ७० र एक सय ७५ आउँछ भन्ने थियो । एमाले एक सय ६० देखि ७० मा झर्छ भन्ने सोचेका थियौं । हामीले आकलन गरेको जति आएन । त्यही भएर ठूलो कम्युनिष्ट पार्टी बन्न सफल भएनौं । एक सय २२ पालिका जित्यौं । यो भनेको पनि धेरै हो’, उहाँले भन्नुभयो ।

केही परिवर्तन विरोधी र बुर्जुवाहरूले माओवादीले धेरै तह जितेको ठाने पनि आफूहरुको स्थिति निर्णायक रहेको अध्यक्षको भनाइ छ । उहाँले भन्नुभयो, ‘देशको राजनीतिको बागडोरलाई कता लैजाने भन्ने चाबी माओवादी केन्द्रलाई नै जनताले दिएका छन् ।’

गोरखा, कालीकोट, रोल्पा, रुकुममा सबै दल हुँदा पनि माओवादीले आफ्नै बुताले जितेको प्रचण्डको भनाइ छ । ‘तर, ललितपुरमा भने सोचेजस्तो परिणाम आएन,’ उहाँले भन्नुभयो, ‘गठबन्धन छ भनेर रिल्याक्स ढंगले पार्टीका नेता कार्यकर्ता लागे । त्यसले मार खायो ।’

प्रचण्डले प्रतिनिधिसभा र प्रदेशसभाको निर्वाचन संघारमा रहेको भन्दै कार्यकर्तालाई अहिलेदेखि नै त्यसमा लाग्न निर्देशन दिनुभएको छ ।