एउटै सेयर दुई जनालाई बेचेर साढे तीन करोड झ्वाम्
एउटै शैक्षिक कन्सल्टेन्सीको सेयर दुई जनालाई बेचेर साढे तीन करोड रुपैयाँ ठगी गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा भक्तपुरको चाँगुनारायण नगरपालिका–८ का ७२ वर्षीय केशवप्रसाद अधिकारी हुन् । उनले काठमाडौंको एउटा शैक्षिक कन्सल्टेन्सीका सेयरधनीलाई तीन करोड ५० लाख रुपैयाँ ठगेका हुन् ।
पूर्वसञ्चालक अधिकारीले पुतलीसडकस्थित अर्बिट इन्टरनेसनलका सेयरधनी नुवाकोटका श्रीबहादुर तामाङलाई पत्तो नदिई साढे तीन करोड रुपैयाँ ठगेका हुन् । आफू ठगिएको भन्दै तामाङको उजुरी परेपछि अधिकारीलाई पक्राउ गरिएको महानगरीय प्रहरी परिसर टेकुले जनाएको छ ।
तामाङबाट साढे तीन करोड लिएपछि अधिकारीले सोही शैक्षिक कन्सल्टेन्सीको सेयर शैक्षिक परामर्श संघ (इक्यान) का अध्यक्ष प्रकाश पाण्डेलाई समेत बेचेको तथ्य खुलेको हो । सेयर स्वामित्व हस्तान्तरण गर्न तामाङलाई मन्जुरीनामा दिइसकेको अवस्थामा पटक–पटक ताकेता गर्दा पनि सेयर स्वामित्व हस्तान्तरण नगरी पाण्डेलाई बेचेको पाइएको प्रहरीले बताएको छ ।
उनलाई थप अनुसन्धानको निम्ति काठमाडौं जिल्ला प्रशासनबाट दुई दिन म्याद थपिएको छ । उनी यसअघि पनि पटक–पटक विभिन्न मुद्दामा पक्राउ परेर छुट्दै आएका थिए ।
अधिकारीलाई सरकारी जग्गा बैना गरी पाँच करोड २० लाख रुपैयाँ ठगेको आरोपमा काठमाडौं उपत्यका अपराध अनुसन्धान कार्यालयले गत जेठ १३ गते अधिकारीको तस्बिरसहित घटनाविवरण सार्वजनिक गरेको थियो । उक्त दुई घटना सार्वजनिक भएपछि उनीविरुद्धका थप घटना समेत सार्वजनिक हुने क्रम बढेको छ ।
यसअघि उनी संलग्न रहेको अर्बिट एसोसिएटले ललितपुर फाइनान्सको ३५ करोड रुपैयाँ ठगी गरेको अर्को आरोप पनि छ ।
टिप्पणीहरू