भाउजु कमरेडले प्रेमीकी पत्नी भकुरेको घटना बुझ्न जाँचबुझ समिति गठन

लुम्बिनी प्रदेशका स्वास्थ्य राज्यमन्त्री विमलाकुमारी खत्री वलीको घटनाको बिषयमा छानबिन गर्न प्रदेश सरकारले जाँचबुझ समिति गठन गरेको छ । आज बसेको प्रदेश क्याविनेट बैठकले आन्तरिक मामिला तथा सञ्चारमन्त्री तिलकराम शर्माको संयोजकत्वमा तीन सदस्यीय जाँचबुझ समिति बनाएको हो ।

समितिको अरु दुई सदस्यमा महिला बालबालिका तथा कानुन मन्त्री रमा घर्तीमगर र मुख्य न्यायधिवक्ता श्रीकृष्ण सुवेदी छन् । मंगलबार स्वास्थ्य राज्यमन्त्री वलीले प्रेमी एकराज बस्नेतकी श्रीमती र छोरीलाई गालामा चड्कन हानेकी थिइन् । त्यसपछि प्रहरीले उनलाई अभद्र व्यवहार गरेको आरोपमा नियन्त्रणमा लिएको थियो ।

दाङको तुलसीपुरस्थित बस्नेतको घरभित्रै पसेर कुटपिट गरेपछि बस्नेतकी श्रीमती मिना भण्डारीले उनीविरुद्ध प्रहरीमा जाहेरी दिएकी थिइन् । तुलसीपुर प्रहरीमा जाहेरी परेपछि थप अनुसन्धानका लागि उनलाई जिल्ला प्रहरी कार्यालय दाङ पठाइएकोमा लुम्बिनीका मुख्यमन्त्री कुलप्रसाद केसी सोनामको विशेष आग्रहपछि रातारात हिरासतबाट छुटाएर बुटवल ल्याइएको थियो ।

हिरासतबाट छुटाएर बुटवल ल्याएलगत्तै ‘अस्वस्थ’ भएपछि उपचारको निम्ति उनलाई लुम्बिनी प्रादेशिक अस्पतालमा भर्ना गरिएको छ । मुख्यमन्त्रीको चाहनामा वारदातस्थलबाट वलीलाई अन्यत्र लैजानु र अस्वस्थ भन्दै अस्पताल भर्ना गरिनुले घटना सामसुम पार्ने सुनियोजित षड्यन्त्र हुनसक्ने आशंका भैरहेका बेला सरकारले जाँचबुझ समिति बनाएको हो।