‘विवाहमा २० वर्षको उमेर हद लगाउँदा अपराध बढ्यो’

कानुन, न्याय तथा संसदीय मामिलामन्त्री गोविन्दप्रसाद शर्मा कोइरालाले अब विवाह गर्नैको निम्ति २० वर्षको उमेर कुर्न नपर्ने बताउनुभएको छ । उहाँले आजको प्रतिनिधिसभा बैठकमा बोल्दै विवाहको उमेर २० वर्षबाट घटाउन कानुन संशोधन प्रक्रिया थालिएको जानकारी दिनुभएको हो ।

कानुन मन्त्रालयले विवाह गर्न न्यूनतम उमेर २० वर्ष राख्दा अपराध बढेको र बाल विवाहमा सजाय भइरहेको आधारमा कानुन संशोधन थालेको पनि उहाँले जानकारी दिनुभएको छ ।

‘विवाहको उमेर १८ वर्ष बनाउनेबारे अध्ययन भइरहेको छ । किनभने व्यक्तिले १६ वर्षको उमेरमा नागरिकता पाउँछ, १८ वर्षमा मतदान गर्न भने २० वर्ष नपुगी विवाह गर्न नपाइने कानुन छ,’ उहाँले भन्नुभयो ‘विवाह गर्न २० वर्ष कुर्नुपर्ने कुनै कारण देखिँदैन । यसले बरु अपराध बढाउने काम गरिरहेको छ अनि बालविवाहमा सजाय पनि भइरहेको छ ।’

यता, मन्त्रीको उक्त भनाइ सार्वजनिक लगत्तै कतिपयले उमेर ढल्केपछि विवाह गरेका महिलाहरुको पाठेघरमा धेरै समस्या सुनिएको पक्षलाई पनि उजागर गरेका छन् ।